Dünən sosial şəbəkələrdə metronun “Koroğlu” stansiyasında polis əməkdaşının xüsusi karantin rejimi dövründə küçəyə çıxma icazəsinin olub-olmadığını yoxlamaq məqsədi ilə bir qadını saxlamasını, daha sonra həmin qadının sosial şəbəkədəki səhifəsinə tanışlıq üçün yazması iddiaları paylaşılıb.

Daxili İşlər Nazirliyinin (DİN) Mətbuat Xidmətindən verilən məlumata görə, məsələ DİN rəhbərliyinin nəzarətindədir və faktın araşdırılması üçün müvafiq göstərişlər verilib.

“Əgər iddialar təsdiqini taparsa, həmin əməkdaş barədə ciddi tədbir görüləcək” – məlumatda bildirilib.

***
Ötən gün Sevda Mahmudova adlı sosial şəbəkə istifadəçisi polis əməkdaşının onun şəxsi məlumatlarını əldə etməsi iddiası ilə bağlı paylaşım edib.

“Qafqazinfo” xəbər verir ki, S. Mahmudova feysbukda açıq post paylaşaraq Daxili İşlər Nazirliyindən məsələnin araşdırılmasını tələb edib. Şikayətçi vətəndaş hətta həmin polisin olduğu iddia edilən fotonu da hesabında paylaşıb.

Onun sözlərinə görə, Koroğlu metrosundakı keçiddən çıxarkən Zahir Abbasov adlı polis əməkdaşı onun şəxsiyyət vəsiqəsinə baxdıqdan sonra məlumatlarını yaddaşda saxlayıb: “Daha sonra həmin şəxs mənə messenger vasitəsilə mesaj yazıb. 2-3 metr aralıda yenə bir polis məni yoxladı. Halbuki həmin şəxs gördü ki, artıq mən yoxlamadan keçmişəm. Bu, ancaq cavan qadınların başına gəlir. Belə çıxır ki, həmin şəxslər vəzifələrindən sui-istifadə edirlər. Mən vətəndaş olaraq nazirlik işçiləri tərəfindən sosial şəbəkədə bu cür narahat edilmək istəmirəm”.

Məsələylə bağlı Bakı şəhər Baş Polis İdarəsiylə əlaqə saxladıq. Qurumdan saytımıza bildirilib ki, məsələ araşdırılır, nəticəsi haqqında ictimaiyyətə məlumat veriləcək.

BIR CAVAB BURAXIN

Please enter your comment!
Please enter your name here