Bizimsesimiz.info // Ankarada nəşr olunan “Bilim ve ütopya” jurnalının iyun nömrəsində Azərbaycan milli azadlıq hərəkatının lideri, Azərbaycanın sabiq prezidenti, tanınmış şərqşünas alim, mərhum Əbülfəz Elçibəyin “Şərqin böyük təbibi” adlı 22 səhifəlik məqaləsi nəşr olunub.
Əbülfəz Elçibəyin Şərqin böyük təbibi və filosofu İbn Sinanın anadan olmasının 1000 illiyi münasibətiylə yazdığı “Şərqin böyük təbibi” məqaləsi ilk dəfə 1979-cu ildə Bakıda “Azərbaycan” jurnalının dekabr nömrəsində çap edilib.

Yazını Türkiyə Türkcəsinə Türkiyədə yaşayan həmyerlimiz, filologiya elmləri namizədi Mayis Əlizadə tərcümə edib.

Qeyd edək ki, “Şərqin böyük təbibi” adlı yazı Əbülfəz Elçibəyin həbsdən çıxandan sonra çap edilən ilk məqaləsi olub. Milli düşüncələrinə görə 1975-ci ildə həbs edilən Elçibəy 1977-ci ildə həbsdən çıxandan sonra Bakı Dövlət Universitetindəki müəllimlik fəaliyyətini davam etdirə bilməyib. Əlyazmalar İnstitutunun direktoru Cahangir Qəhrəmanovun təşəbbüsü ilə İnstitita elmi işçi vəzifəsinə qəbul edilən Əbülfəz Elçibəy bir neçə ildən sonra “Şərqin böyük təbibi” adlı elmi məqaləsini çap etdirə bilib.

Moderator.az-a açıqlama verən “Bilim ve ütopya” dərgisinin baş redaktoru Əmrah Maraşo gördükləri nəcib işlə bağlı bunları deyib:

“Məqalə bizə daxil olandan sonra bu sahədə tanınmış bir alimə rəy almaq üçün göndərdik. Alim qısa müddətdə məqaləni oxuyaraq yüksək fikir bildirdi. Və biz yubanmadan məqaləni iyun nömrəmizə daxil etdik. Məqalə çap ediləndən sonra Türkiyənin elmi dairələrindən çox gözəl reaksiyalar aldıq. Azərbaycanın görkəmli elm və siyasət adamlarının, ictimai xadimlərinin yazılarını bundan sonra da çap etməyə hazırıq”.

Moderator.az-a daxil olan digər məlumata görə, Türkiyənin ədəbiyyat jurnallarından biri də yaxın vaxtlarda Əbülfəz Elçibəyin 1981-ci ildə yazdığı və böyük Azərbaycan şairi Məhəmməd Hüseyn Şərhiyarın “Heydərbabaya salam” poemasına həsr etdiyi “Haqqın da bükülməz qolu, dönməz üzü vardır”- adlı məqaləsini çap edəcək. Sözügedən məqalə Bakıda “Azərbaycan” jurnalının 1981-ci il fevral nömrəsində çap edilib.(moderator.az)

BIR CAVAB BURAXIN

Please enter your comment!
Please enter your name here