Ruslan Bədirov Publika.az-a açıqlamasında bildirib ki, yanğın gecə saat 03 radələrində olub:

“Gecə kənddə işıqlar sonmüşdü, ona görə kamen işlədirdik. Gecə qəfildən yanğına oyandıq. Özümüz yanğını söndürə bilmədik, gecə qaranlıq olduğundan evdən çıxanda alov bizi ütdü. Yanğınsöndürənlərə zəng etdik, onlar yanğının qarşısını aldı. Hadisə nəticəsində iki azyaşlı uşağım yüngül xəsarət almışdı. Gecə xəstəxanada həkimlər yardım göstərib, evə buraxdılar. Hazırda vəziyyətləri yaxşıdır, müalicələri evdə davam etdiriləcək”.

R.Bədirov evinin keçmiş nazir Ziya Məmmədovun villasına aid olmadığını deyib:

“Yaxınlıqda villa var, mən ona nəzarət edirəm. Amma həmin villa hazırda Ziya Məmmədova məxsus deyil. Əvvəl onların olub, sonra satılıb. Hazırda başqa bir şəxsə məxsusdur, villanın sahibi ildə bir dəfə gəlib bir gün qalıb gedir. İl ərzində evə mən nəzarət edirəm. Mənim evimin həmin villa ilə bir əlaqəsi yoxdur”.

***

Kənd sakinlərinin Publika.az-a verdiyi məlumata görə, yanan ev keçmiş nazir Ziya Məmmədovun qardaşı Nəriman Məmmədova məxsusdur.

Məlumata görə, ərazidə bir neçə villa olub. Hadisə baş verən villada isə oranı mühafizə edən İsmayıllı rayonu Qubaxəlilli kənd sakini Ruslan Bədirov ailəsi ilə birgə yaşayırdı.

Hadisə nəticəsində R.Bədirovun iki azyalı (3 və 5 yaşlarında) övladı xəsarət alıb və onlar xəstəxanaya yerləşdiriliblər. Ev taxtadan olduğundan tamamilə kül olub.

 

***

İsmayıllı rayonunda ötən gecə yanan evin sabiq nəqliyyat naziri Ziya Məmmədova məxsus olduğu məlum olub.

Hadisə fevralın 19-da saat 4:00 radələrində rayonun Buynuz kəndində qeydə alınıb.

Meşəlik və dağlıq ərazidə yerləşən, keçmiş nəqliyyat naziri Ziya Məmmədova məxsus böyük həyətyanı sahədə inşa edilən evlərdən biri yanıb.

Yanğın Ziya Məmmədovun villasının yanında taxtadan müasir üslubda inşa edilən 3 otaqlı, bir mərtəbəli mənzildə baş verib.

Villanı mühafizə edən və həmin mənzildə yaşayan İsmayıllı rayonu Qubaxəlilli kənd sakini, 1987-ci il təvəllüdlü Bədirov Rəsul Zöhrab oğlu telefonla zəng edərək yanğın barədə FHN-nin İsmayıllı Dövlət Yanğından Mühafizə Hissəsinə məlumat verib.

Ümumi sahəsi 144 kvadratmetr olan mənzildə baş verən yanğının söndürülməsi üçün əraziyə 2 yanğınsöndürən avtomobil və canlı qüvvə cəlb edilib. Hadisə zamanı ev içərisindəki əşyalarla birgə tamamilə yanaraq yararsız hala düşüb.

Buynuz kəndi rayon mərkəzindən 25 kilometr aralıda yerləşdiyi və yanğın barədə FHN-nə gec məlumat verildiyi üçün alovun qarşısını almaq çətin olub. Hadisə zamanı xəsarət alan olmayıb. Yanğının hansı səbəbdən baş verdiyi hələlik məlum deyil.

Faktla bağlı araşdırma aparılır.

BIR CAVAB BURAXIN

Please enter your comment!
Please enter your name here