Bizimsesimiz.info // Azərbaycan Respublikasının Dini Qurumlarla İş üzrə Dövlət Komitəsinin sədri Mübariz Qurbanlı noyabrın 1-də Ciddə şəhərində İslam Əməkdaşlığı Təşkilatının Baş katibi Yusif bin Əhməd əl-Useymin ilə görüşüb.

Komitənin mətbuat xidmətindən verilən məlumata görə, görüşdə Azərbaycan Respublikası ilə İslam Əməkdaşlığı Təşkilatı arasında əlaqələrin yüksək səviyyədə olduğu bildirilib, əməkdaşlığın genişləndirilməsi və qarşılıqlı maraq doğuran məsələlər barədə geniş fikir mübadiləsi aparılıb.

Komitə sədri Mübariz Qurbanlı İƏT-in baş katibinə Azərbaycan Respublikasının Prezidenti İlham Əliyevin səmimi salamlarını çatdırdıqdan sonra qeyd edib ki, Azərbaycan İƏT-ə üzv olduqdan sonra öz təşəbbüskar mövqeyi ilə seçilir, üzərinə düşən vəzifələri həmişə yerinə yetirir, təşkilatın prinsiplərinə uyğun işini həyata keçirir. Azərbaycan təmsil olunduğu bütün beynəlxalq platformalarda həm özünün dövlət maraqlarını, həm də İslam mədəniyyətini, İslam dünyasının ortaq mənafelərini müdafiə edir. Prezident İlham Əliyev hər fürsətdə İslam dünyasının yaşadığı problemləri dilə gətirərək onların həllində yardımçı olmağa çalışır.

2017-ci ilin Azərbaycanda “İslam Həmrəyliyi İli” elan olunduğunu xatırladan Mübariz Qurbanlı bu çərçivədə DQİDK-nın QMİ ilə birgə həm Azərbaycanda, həm də beynəlxalq miqyasda keçirdiyi və keçirəcəyi çoxsaylı tədbirlər barədə məlumat verib, bu kontekstdə İslam Əməkdaşlıq Təşkilatının Baş katibini cari ilin dekabrında keçiriləcək yekun beynəlxalq konfransa dəvət edib və İƏT ilə əməkdaşlıq çərçivəsində bu tədbirin daha səmərəli və təsirli ola biləcəyini diqqətə çatdırıb.

Öz növbəsində ölkəmizə səfərini və səfər zamanı ölkə başçısı cənab İlham Əliyevlə ikitərəfli görüşünü xatırlayan İƏT Baş katibi Əhməd Əl-Useymin bu səfərin onda olduqca xoş təəssüratlar buraxdığını, Ermənistan-Azərbaycan, Dağlıq Qarabağ münaqişəsi ilə bağlı İƏT-in birmənalı və dəyişməz mövqeyini bir daha vurğulayıb, bu məsələdə hər zaman Azərbaycanın haqlı mövqeyini dəstəklədiklərini bildirib.

Sonda İƏT baş katibi rəhbərlik etdiyi qurumun İslam dünyasının maraqlarının müdafiəsi və problemlərinin həlli sahəsində fəaliyyətinə hərtərəfli dəstəyə görə Azərbaycan Respublikasına və Prezidentinə təşəkkürünü bildirib, Azərbaycan Prezidentinin fəaliyyətinin, onun daxili və xarici siyasətinin, İslam dünyasının problemlərinə göstərdiyi diqqətin təqdirəlayiq olduğunu bir daha diqqətə çatdırıb.