İngiltərənin “Arsenal” klubunun sabiq futbolçusu Emanuel Adebeyor ailəsi ilə bağlı maraqlı məqamlara toxunub.

Oxu.Az xəbər verir ki, 34 yaşlı Toqo millisinin hücumçusu anasının ona qarşı naşükürlüyündən danışıb:

“Mən kiçik olanda xəstə uşaq idim. Anam hər gün məni kilsəyə aparıb sağalmam üçün dualar edirdi. Buna görə həmişə özümü ona borclu bilmişəm. Futboldan qazandığım ilk pullarla ailəmə bir ev aldım. Hər mükafat qazananda anama zəng edib ona təşəkkür edirdim.

İş qurması üçün ona külli miqdarda pul göndərmişdim. Hətta reklam üçün adımdan istifadə etməsinə izin verdim. Qızım olduğunda anama zəng vurdum. Ancaq o, telefonu üzümə bağladı. Bir uşaq anası üçün daha nə edə bilərdi ki?”

Daha sonra “Mançester Siti” və Madrid “Real”ının sabiq futbolçusu bacısı və qardaşından eyni amansız rəftarla üzləşdiyini bildirib:

“Qanadakı bacıma 1 milyon 250 min dollar dəyərində bir ev aldım. Bir neçə ay sonra onları ziyarətə gedəndə evi başqalarına kirayə verdiklərini gördüm. Bunun səbəbini soruşanda isə mənə təhqirlər yağdırdı. DÇ-2002-də Foenin formasını almışdım.

Formanı çox etibarlı bir yerdə saxlayırdım. Ancaq qardaşım Rotime onu tapıb satdı. Monakoda oynayarkən ÇL-da “Real” ilə qarşılaşmışdıq. Oyundan sonra Zidanın formasını almışdım. Onun formasını aldığım üçün özümü çox xoşbəxt sayırdım. Ancaq qardaşım bu formanı da satdı.

“Mets”də ayda 15 min dollar maaş alırdım. Üç ay aldığım pulu yığıb anama bu günə qədər etdiklərinə görə bir hədiyyə aldım. Sonra qardaşım Rotime və iki dostu bu hədiyyəni evdən oğurlayıb 800 avroya satdılar. Anam onların gənc olduqlarını bildirərək bu məsələni böyütməməyimi söylədi. Evdə şəxsi əşyalarımı saxladığım bir otaq var idi.

Rotemi o otağın qapısını da qırıb hər şeyi satırdı. Ancaq qardaşımın bütün etdiklərinə rəğmən, mən onu Fransada bir Futbol Akademiyasına yazdırdım. O isə 27 nəfərlik heyəti olan bir komandanın 21-nin mobil telefonunu oğurladı. Kamerunlu sabiq futbolçu Sanqo ilə çox yaxın dost idim. Qardaşım Rotime bu dəfə də onun oğlunun “Play Station”ını oğurladı.

Hazırda Türkiyə çempionatının lideri “İstanbul Başakşəhər”də çıxış edən Emanuel Adebeyor bütün bunlara görə intihar etmək istədiyini dilə gətirib:

“Monako”da oynayanda ölkəmdəki ehtiyac sahiblərinə yardım etmək üçün hamıdan ayaqqabı istəyirdim. Rotime onları oğurlayıb ölkənin ən böyük idman geyimləri mağazasına satdı. Hər şeyi unudub ölkəmə ailəmi ziyarətə getdim. Qardaşım bu dəfə bıçaqla üstümə gəlib məndən pul tələb etdi. Canımı birtəhər qurtardım. Nə edəcəyimi bilmirdim. İntihar etməyi belə düşünürdüm. Dünyada ailəsi tərəfindən bu qədər əzab görən yeganə adam mən olaram”.